යාන්ත්‍රිකයා භෞතික විද්‍යාව කණපිට පෙරළයි...!! ෆිසික්ස් ලොව මවිත කළ විසි එක් වෙනි සියවසේ මහා සොයා ගැනීම ලංකාවෙන්..!!

පහුගිය දා යාන්ත්‍රිකයා ඉතා වෙහෙස වී විශාල කැපවීමකින් හා සැලකිය යුතු කාලයක්ද කැප කරමින් වත්ත සුද්ධ කරමින් සිටි මොහොතේ භෞතික විද්‍යාව කණපිට පෙරළිය හැකි මට්ටමේ මූලධර්මයක් සොයාගන්නා ලදි......

            භෞතික විද්‍යා ලෝලීන්ගේ දැනගැනීම සඳහා යාන්ත්‍රිකයා එය මෙසේ සිය බ්ලොග් අඩවියේ  සඳහන්කරනු ලැබේ. ඔහු විසින් එය යාන්ත්‍රිකයාගේ සංවෘත විවෘතතාව පිළිබඳ සර්වත්‍ර නියමය වශයෙන්ද නම් කොට ඇත.

                  මේ වගේ වැදගත් තැනකට මෙයා රිංගුවේ කොහෙන්ද?? බැලුවම මෙතනින්        

                

යාන්ත්‍රිකයාගේ සංවෘත විවෘතතාව පිළිබඳ සර්වත්‍ර නියමය:-

            “විශවයේ පවතින ඕනෑම භෞතික, විවර කළ හැකි දොරක් සහිත උපකරණයක් හෝ පද්ධතියක් එය සංවෘත කොට ඇති අවස්ථාව එයම විවෘත කොට ඇති අවස්ථාවට සර්වසම වේ...”

පැහැදිලි කිරීම:-

            ෆිසික්ස් දත් නොදත් සැමදෙනාගේ දැනගැනීම පිණිස මෙම සංකීර්ණ භෞතික විද්‍යා මූලධර්මය යාන්ත්‍රිකයා විසින්ම මෙසේ සරලකොට පහදා දී ඇත. මෙය යාන්ත්‍රිකයා සමග පහුගියදා ප්‍රසිද්ධ පුවත්පතක් සිදුකළ පුවත්පත් සාකච්ඡාවකින් උපුටා ගන්නා ලද බව සලකන්න..

            “ඇත්තෙන්ම මේක පැහැදිලි කරන්න තරම් වචන සිංහල භාෂාවේ නෑ.. ඒත් මං ඉංග්‍රීසි භාෂාව වැඩිය නොදන්නා නිසා දන්න වචන දාල හරි සිංහලෙන්ම කියන්නං... මෙහෙමයි.. අපි හිතමු මේ විශ්වයේ තියෙන ඕනෑම වහල තියෙන දෙයක් ඒකම ඇරපු වෙලාවට සර්ව සමයි කියල තමයි මගේ දාර්ශණික බුද්ධියට අනූව ඔය කියල තියෙන්නේ... අපි හිතමු වහල තියෙන මගේ ඇඳුම් අල්මාරිය.. ඒකම ඇරල තියෙන වෙලාවට සර්වසමයි කියල තමයි ඔය කියන්නෙ... ඒක විශ්වයේ තියෙන ඕනම වස්තුවකට අදාල කරන්න පුළුවං නිසා සර්වත්‍ර නියමයක් ලෙසට පෙන්වා දෙන්න පුළුවං”

            යාන්ත්‍රික මහාචාර්ය තුමා මෙය විද්‍යාත්මකව සරල වීජ ගණිතය භාවිතා කොට සාධනය කොට පෙන්වා ඇත. පහත දැක්වෙන්නේ ඒ සඳහා එතුමා භාවිතා කළ සංකීර්ණ ගණිත කර්මයයි.. නමුත් එතුමාගේ තාර්කික ඥාණය හා බුද්ධිය නිසා ඉතා කුඩා පියවර ගණනකින් සිදුකර ඇත.

සාධනය කිරීම:-

දත්තය:- අපගේ පහසුව සඳහා දොරක් ගනිමු..

සාධනය:- දී ඇති දොර බාගෙට විවෘත කර ඇතැයි සලකන්න..

            එවිට,

            බාගෙට ඇරපු දොර = බාගෙට වහපු දොර

            දැන්,

            බාගෙට බාගෙ කපල දැම්මහම,

            බාගෙට ඇරපු දොර = බාගෙට වහපු දොර

            ඇරපු දොර = වහපු දොර

වැදගත්:-

            මින් පසු යාන්ත්‍රිකයා තව දුරටත් නිකංම යාන්ත්‍රිකයෙක් නොවන බවත් ඔහු අයින්ස්ටයින් ගණයේ මහාචාර්ය යාන්ත්‍රිකයෙකු බවත් සැලකුව මනාය......

            තවද මේ සොයා ගැනීමෙන් පසු දෙස් විදෙස් මාධ්‍ය වලින් සහ  විද්‍යා සඟරා වලින් විශාල සම්මුඛ සාකච්චා ප්‍රමාණයකට ආරාධනා ලැබී ඇති නිසා ත් මේ සොයා ගැනීම පිළිබඳව දෙස් විදෙස් මහාචාර්ය වරුන්ගේ ගැටළු වලට පිළිතුරු දීමට සිදුව ඇති නිසාත් මේ සොයා ගැනීම සම්බන්ධව විශාල සම්මන්ත්‍රණ සංඛ්‍යාවකට සහභාගී වීමට ඇති නිසාත් මේ දින කීපයේ මහාචාර්ය යාන්ත්‍රිකයාට බ්ලොග් කියවීමට හා කොමෙන්ටු දැමීමට වෙලාවක් නැති බවද සලකන්න...