රිලව් ඇවිල්ලෝ...

අද කියන්න යන්නෙ අපේ පැත්තේ ප්‍රාදේශීය අර්බූධයක් ගැන.. රිලව්.. මුලු ගමම ආක්‍රමණය කරල..  සමහර ඉඩම් වල උන් අධිගෘහිත වෙලා.. රතිඤ්ඤ නෙවෙයි බෝම්බ දැම්මත් යන්නෙ නැති ගානට උන් බය නැතිවෙලා.. කිසිම අවුලක් නැතිව ඇරල තියෙන ගෙවල් වලට පැනල තියෙන කෑම අරගෙන යනව.. ගෑනු අයගෙ ළමයින්ගෙ ඇඟට පනිනව..

අර ඩී.ඩී.ටී. වලට  මැලේරියා මදුරුවෝ පුරුදු වුණා වගේ රිලව් රතිඤ්ඤා වලට අනුවර්තනේ වෙලා...

දිවිය නගන්න ඇට බීජ පැකැට් බෙදල දුන්නට කොහේ වවන්ටද? වැඩිහරියක් ගෙවල් වල වැඩේ අතෑරල දැම්මෙ මේ රිලව් නිසා. අපි වවනව.. උන් කනව..

මේ ප්‍රශනෙ අපේ ගමට විතරක් නෙවේ මයෙ හිතේ.. රන්දෙණිගල වගේ ගම් වලටත්, නුවර ටවුමේ පවා ලක්ෂ ගාණක් රිලව්... ඔය පේපර් මාකිං යන ටීචර්ලගෙ කෑම පැකට් හෙමත් මුන් උදුරගෙන යනවලු..

මෙතන තියෙන අවුල තමයි රිලව් මීට අවුරුදු හතර පහකට කළින් මෙහෙම හිටියෙ නැති එකයි.. එහෙනං කොහෙන්ද මෙච්චර රිලව් තොගයක්? මොකෝ මේ අවුරුදු හතර පහේ දී එක වතාවකට රිලවියක් පැටව් විසිපහ තිහ වදන්ටැයි?.. 

කොහොම නමුත් රිලව් බෝ වෙලා.. ආරංචි හැටියට ටවුමට ආපු රිලව් ගම් වලට ගෙනත් දාලා අළුත් ලෙඩක් මවල තියෙන්නෙ අපේ ආණ්ඩුවේ රස්සා කොරන මහත්තුරුමලු..  ඊට පස්සෙ අඩුම තරමෙ ටවුමෙ රිලව් වඳ වුණානං මොනව හරි කියුවහැකි.. ඒ වැඩෙත් බාගෙටනෙ.. මේකෙං වු‍ණේ රට පුරා රිලව් බෝවුණ එක විතරයි.. උන් අල්ලල ඔය ජාතික කැලෑවකට දැම්මනං මොකද වෙන්නෙ?

මේකෙන් තවත් අවුලක් මතුවෙලා.. රිලව් එන එක නවත්වන්ඩ මිනිස්සු තරඟෙට ගස් කපල දානව.. කොස් ගස් වගේ වටින ගස් පවා සෑහෙන්ඩ අතු කපල දාල.. ගිය අවුරුද්දෙත් ඔය වැඩේම කරපු හන්දා මේ අවුරුද්දෙ නියඟෙට කොස් ගෙඩියක් හොයාගන්ට බැරිව ගියා.. කවුද දන්නෙ ලබන අවුරුද්දෙත් නියඟයක් එයිද නේයිද කියල..

වෙච්චි වැරැද්ද හදන එක කාගෙ කාගෙත් යුතුකමක් ඕං.. නැත්තං බෝංචි පැලයක් වත් අපේ ගම් වල මිනිස්සුන්ට වවාගන්ට බැරිවෙයි.. එතකොට රට ස්වයං පෝෂිත කොරන්ට සෑහෙන්ට අමාරු වෙන්ට ඉඩ තියෙනව හොඳේ..