Friday, December 28, 2012

පවුකාර කුකුල් කකුල

           අපේ සයන්ස් වන් පන්තිය ඕනම කූට වැඩකට ඉතා ආරක්ෂාකාරී එකක් වේ. ප්‍රධාන ශාලාව අප පංතිය ආසන්නයේම පිහිටියත් පංතියේ දොර වැසූ පසු පංතිය ඇතුළේ කිසිදු ශබ්ධයක් පිටතට නොඇසේ.. ඉතින් මෙවැනි තැනකින් වැඩක් ගන්නේ අපි හැර වෙන කවුද?

      උදාහරණයක් ලෙස සමහර දිනවල ක්‍රිකට් සෙල්ලම් කළේද පන්තිය තුළය(මේ බොහෝ විට නිවාඩු දෙන දවසයි)..

     අද කතාව අපේ කෑම විනාඩි විස්ස ගැනයි.. අපේ කාල සටහනේ කාලය වෙන් කර තිබුණේ එක විෂයකට පීරියඩ් දෙක බැගිනි.. ඒ අනූව දවසකට විශයන් හතරකි.. සමහර දිනවල මුල් පීරියඩ් දෙක එක් විෂයකුත් ඉන් පසු ඊළඟ පීරියඩ් දෙක එම විශයේම ප්‍රැක්ටිකල් පීරියඩ් දෙකකුත් තිබුණි.. එවැනි දවසක අදාල විශයේ ගුරුතුමිය හෝ ගුරුතුමා නොපැමිණියොත්............................................................

      එවැනි දවසක මුලින්ම කරන්නේ ක්ලාස් එකෙන් දීතිබුණු ටියුට් එකේ වැඩ කිඩ කොටස අහවර කිරීමයි.. ඒ සඳහා පීරඩ් එකක් හෝ දෙකක් යොදාගනී.. ඉතිරි පීරඩ් දෙකේ පංතියේ මගුල් නටමු..

      මේ වැඩ වල දී අවුලක් නොවන්නේ හෙඩ් ප්‍රිෆෙක්ට් හිටියේ අපේ පංතියේ නිසාය...

     අපිට ඉන්ටවල් දෙන්නේ දහයහමාරටයි.. එහෙත් උදේ නවය වන විට ආමාශයේ පණුවන් බ්‍රේක් ඩාන්ස් දැමීමට පටන්ගනී.. ‍ ඒ වෙලාවට මැඩම් හරි සර් හරි නොහිටියා නම්...........................................

      මේ එවැනි දවසකි.. පංතියේ මැඩම් ද නැත..
               "ඕන මගුලක් වෙන්න කියා කමු බං"
                     ඒ හෙඩාය...
 මේ වගේම  කුකුල් කකුලක් හැබැයි පවුකාරයි...... පිංතූරය මෙතනින්

    සාමාන්‍යයෙන් අපේ කෑම ගැනීමේ රටාව ඔක්කොම එකටය.. පංතියේ තිස් හයකි.. කණ්ඩායම් දෙකකට ආහාර ගනු ලැබේ.. ඩෙස් දෙකක් දාගත් අපි වෙන මගුලක් වෙන්න කියා කන්න පටන්ගතිමු.. සාමාන්‍යයෙන් පංතියේ වැඩිදෙනෙක් දතකාරයින් උණත් බහුතරයකගේ ප්‍රියතම ආහාර වේල පරිප්පු, බත් ,අල වැනි දේය.. ඒවා නැති දාට කන්න හිතෙන්නේද නැත.. විස්සක් එක්ක කන එකද ලේසි නැත.. වතුර බිබී හුස්ම අල්ල අල්ල කන්න ගියොත් සම්මජ්ජාතියට බත් කටක් වත් කන්න වෙන්නෙ නැත.. අත් හෝදන්න ගියොත් එනකොට මගේ කෑම එකත් ඉවරය... සෞඛ්‍ය බලබල කන්න නම් වෙන ක්‍රමයක් හොයා ගත යුතුය..

     මෙසේ පංතියම වන කරගෙන කන විට සාමාන්‍යයෙන් තමන්ගේ බත් එකේ මොනවද තියෙන්නේ කියා නොකියා සිටීම කාගෙත් සිරිත වන්නේ එය තමන්ගේ වාසියට ගැනීම සඳහාය.. උදාහරණයක් ලෙස මගේ බත් එකේ මාළු කෑල්ලක් තියෙනවනම් මං කරන්නේ ඒක මගේ පැත්තට හැරෙන විදියට කෑම එක දිගෑරීමය..

     මෙසේ පරිප්පුයි බතුයි කන අතරේ සමහර කෙනෙක් බිත්තරයක් මස් කෑල්ලක් මාළු කැල්ලක් බත්එකට දාගෙන එයි.. ඒවගේ මස් කෑල්ලක් මෙදිනද බත් එකක තිබුණි..

     ක්ෂණිකව ඒපැත්ත බලා මේ පැත්ත බලන විට බත් එක අතුරුදහන්ය.. ඒකෙ තිබුණු මස් කෑල්ලද අතුරුදහන්ය.. බත් එක පංතිය පුරාය.. පංතිය අතුගාන්න බලන විට බත් එකේ තිබිය යුතු මස් කෑල්ල කළු ලෑල්ල ගාවය...

    මේ වගේ තවත් දවසක ඉන්ටවල් එකට කළින් කා ප්‍රින්සිපල්ට මාට්ටු විය..
         "බලනව තමුසෙලා නිකං සත්තු වගේ... පංතිය සුද්ද කරල දානව.."
                     එකසිය ගාණට ගුටි බලාපොරොත්තුවෙන් සිටි අපට ලැබුණේ නොසිතූ පිළිතුරකි..ඒත් පංතිබාර මැඩම්ට ප්‍රින්සිපල් එකසිය ගාණට දෙහි කපා තිබුණි..

     ක්ලාස් එකේ කන කෑම මීට වඩා වෙනස් වන්නේ කණ්ඩායමේ සමාජිකයන් ගාන අඩුවන නිසාවෙනි.. දිග ඩෙස්වල දහයකට පහළොවකට කන්න නොහැකි නිසා පහක් හයක් බැගින් කණ්ඩායම් හැදේ... ඒත් අනිත් කණ්ඩායමක වත් කුකුල් කකුලක් තිබුණොත් සහ අපේ කවුරුහරි ඒක දැක්කොත්......
                        පවු.......අහිංසක කුකුලා....... මැරෙනකොටවත් එච්චර දුක් විඳින්න නැතුව ඇති............

    කෑම ගැන කියනකොට ම‍ගේ යාළුවා අමතක කරන්න බැරිය.. ඌට ගෙදරින් ලැබෙන්නේ රුපියල් සීයකි.. ඒ හරියටම නුවර ගොස් ආපසු ඒමටය.. ඒත් ඒ රුපියල් සීයෙන් රුපියල් හතළිස් පහක බස් එකේ ගිහින් තව සීයක කාල හතළිස් පහකින් ගෙදරත් එයි....ඊට පස්සෙ මටත් කන්න අරන් දෙයි...
-----------------------------------------------------------------------------------------------
පංතිභාර මැඩම් සහ ප්‍රින්සිපල් සර් ගැන වචනයක් නොකියන්නේ නම් ඒක ලොකු අඩුවකි.
පංතිභාර මැඩම් වයසින් පණහට වැඩි වුවත් අපේ කොල්ලොත් එක්ක හි‍ටියේ යාළුවෙක් වගේ.. ඒත් තමන් ගුරුවරියක් බව ඈ අමතක කලේ නෑ.. අපේ අදහස් වලට ඇහුම්කන් දුන්නා.. ඒ නිසා එතුමියට  කවුරුත් ගරු කළා..
  
විදුහල් පති තුමා මං දැකපු විශිෂ්ඨ පාලකයෙක්.. ඉස්කෝලෙ ළමයි විතරක් නෙමෙයි ගුරුවරුන්වත් නියමෙටම පාලනය කරගෙන හිටිය.. ඒක ඉස්කෝලෙ බැබලෙන්නට ප්‍රධාන හේතුවක් විදියට දකින්න පුළුවන්..

   


    

Sunday, December 23, 2012

යාන්ත්‍රික දේවතාවා බැලූ දසමහ බැලුම්



            යාන්ත්‍රික දේවතාවා නිම්මාණරතියේ සිට දිවැසින් මනුලොව දෙස බලා සිටින්නේ, තවත් සියදාස් ගානක් දෙවි දේවතාවුන් පැමිණ,
            අවසර යාන්ත්‍රික දේවතාවුණි, මේ ඔබ වහන්සේ මිනිස් ලොව ඉපදෙන්නට කාලයයි ලෙස මිනිස් ලෝකයේ ඉපැදෙන්නට ආරාධනා කළහ..
යාන්ත්‍රික දේවතාවා ඒකාලේ හෙන දරුණු ඩයල් එකක් ලූ
පිංතූරය මෙතනින්

            යාන්ත්‍රික දේවතාවා කල් යල් බලා මිනිස් ලොව ඉපැදෙමියි සිතා එසේමැයි කියා දේවතාවුන්ගේ ආරාධනය ඉවසා වදාළේය...

            ඉතින් යාන්ත්‍රික දේවතාවා ඊට ගැලපෙන පරිසර තත්ව පිරික්සන්නට පටන්ගත්හ..

01.කාලය:-
            යාන්ත්‍රිකයා දෙදා‍ස් පණහේ අදහස් තියෙන අනූව දශකයට අයත් එකෙකි.. යාන්ත්‍රිකයා ප්‍රිය කරන සිංදු පවා ඊට ගැලපෙන සේ වන්නේය.. ඒ නිසා ඌ දෙදාස් පණහට වැඩිය ජීවත් විය යුතුය.. තවද දෙදාහට කළින් ඉපදිය යුතුය.. මේ නිසා එකදාස් නමසිය අනූතුන යාන්ත්‍රික දේවතාවා විසින් සිලෙක්ට් කරන ලදි..

02.දීපය:-
            වමට බර ඩයල් එකක් නිසා ආසියාව සුදුසු යැයි තීරණය කලේය..
03.දේශය:-
අනාගතයේදී යාන්ත්‍රිකයා සිංහලෙන් බ්ලොගක් කොටන්නට පටන්ගන්නේය.. තවද පල් හෑලි ලියා අනුන්ගේ කාලයද කා දමන්නේය.. මේ නිසා සිංහල රටක ඉපැදිය යුතුය.. ඉතිං එහෙවු රටවල් ඇත්තේ එකක් නිසා ඉපැදෙන්නට ලංකාව තෝරා ගත්තේය..

04.කුලය:-
            යාන්ත්‍රික දේවතාවා මෙය සිලෙක්ට් කරන ලද්දේ මංගල යෝජනා තීරය කියවීමෙන් පසුවය... :)

05.මව:-
            සුදුස්සාට සුදුසු තැන දෙන යාන්ත්‍රික දේවතාවා, යාන්ත්‍රකයාගේ මව වීමට පෙර පින් ඇත්තියන්ගේ නම් ලිස්ට් එක පිරික්සන්නේ, යාන්ත්‍රිකයාගේ මව වීමට වැඩිම සුදුසුකම් ඇති අපේ අම්මාට ඒ චාන්ස් එක දීමට තීරණය කළේය..

06.පියා:-
            කළිං ආත්මෙ දෙයියො උණත් යාන්ත්‍රිකයාත් අවලං වීමට ඉඩ තිබෙන්නේය.. එසේ නොවී උගෙ අනාගතය හදන්නට ඉතා සුදුසු පිය වරයෙක් උවමණාය.. ඊට ගැලපෙන පෙර පින් ඇති පියෙක් යාන්ත්‍රික දේවතාවා තෝරා ගත්තේය..

07.සහොදර සහොදරියෝ:-
            සහෝදරයන් නම් අරහන්ය.. උන් එක්ක මරාගන්නවාට වඩා අනාගතයේ යාන්ත්‍රිකයාට වැඩ තිබෙන්නේය.. තව ඉස්කෝලෙ ගිහිං එනකොට හවස් වන්නේය.. ඉතිං ඒ අතරේ තමන්ගේ ඇඳුමක් මැද දීමට වත් සහෝදරියක් සුදුසුය.. අනික ඈ වැඩිමල් වූවොත් ඔක්කේම අබ්ලික්ය.. ඒ නිසා යාන්ත්‍රිකයාට වඩා බාල විය යුතුය.. තවද තනි සොයුරියක් සිටියොත් ඈ ආරක්ෂා කිරීමට අමතරව තවත් දෙයක් යාන්ත්‍රිකයාට නැති වන්නේය.. ඒ නිසා එක වගේ ඉහත ගුණ ඇති සොයුරියන් ඩබලක් ඉතා අගනේය.. මෙසේ සිතූ යාන්ත්‍රික දේවතාවා පෙර පින් ඇත්තියන් අතරින් ඉහළින්ම සිටි දෙදෙනෙක් ස්වකීය කිඹුල් සොහොයුරියන් ලෙස සුදුසුයැයි සටහන් කරගත්තේය...

08.ආගම:-
            යථාර්ථයට මුල් තැන දෙමින් ගැඹුරු සහ පෙර ප්‍රාර්ථනා පරිදි බුදු දහම තෝරා ගත්හ...

09.පාසල:-
            පාසල් කීපයකටම යාමට පිං කැර ඇති නිසා ඊට ඉඩ දීමට යාන්ත්‍රික දේවතාවා තීරණය කළේය..:) තවද යාන්ත්‍රිකයා කළිං ආත්ම වලදී ෆ්‍රී ටියුෂන් කර පිං සිදු කරගෙන තිබූ බැවින් සුපිරි ගුරුවරු සෙට් එකක් ලැබීමට නියමිතය.. ඒ අය පෙර ආත්ම වල යාන්ත්‍රිකයාගේ ගෝල බාලයින් වන්නේය.. මේවන විටත් මෙලොව එළිය දැක තිබූ ඒ අය අය කළ කරුම පටිසන් දීම් වශයෙන් ඔවුන්ට අති දුෂ්කර පාසලක් ඒ වනවිටත් ලැබී තිබුණේය.. අනුන්ගේ පවු ගෙවන්නට යාන්ත්‍රිකයාට සිදුවන්නේ මෙතනදීය.. මොනවා කරන්නටද කියා යාන්ත්‍රික දේවතාවා ඒ පාසල ඔහුගේ දෙවන පාසල ලෙස තෝරා ගන්නේය..
           
ඒත් යාන්ත්‍රික දේවතාවා පෙර කිසිම ආත්මයක පහත දැක්වෙන සබ්ජෙක්ට් ටික කිසිදු ගෝලයෙකුට උගන්වා නොතිබුණේය...
1.      මියුසික් (ඉංගිරිසියෙන් සංගීතය)
2.      කඩ්ඩ
3.      අයි.ටී
ඒ පව පළ දීමක් ලෙස මේ ආත්මයේදී යාන්ත්‍රිකයා කැමති වුවත් ඒවා
ඉගෙන ගන්නට නොලැබෙන්නේය.. ඒත් කළිං ආත්මයක සාධාරණව ලොකු ඉස්කෝලෙකට ළමයි දා දුන් පිණ පසුව පටිසන් දෙන්නේය..
           
            මෙසේ සලකා බැලූ දේවතාවා සුදුසු පාසල් හතරක් අනාගතය සඳහා තෝරා තබන ලද්දේය..

10.ග්‍රාමය:-
            අනාගතය කාබන්ඩයොක්සයිඩ් වලින් පිරී යනු දුටු දේවතාවා හුස්ම ගත හැකි පරිසරයක් සහිත කන්ද උඩරට ඩොටේ ග්‍රාමයක් වාසස්ථානය පිණිස තෝරා ගන්නේය.. නමුත් සෞඛ්‍යය ගැන පමණක් හිතා කළ ගොන්කමේ තරම පසුව යාන්ත්‍රික දේවතාවට වැටහෙන්නේය.. ක්ලාස් යාමේ පව පටිසන්දීමට පටන්ගත් පසු යාන්ත්‍රිකයාට දෙලොවම එපා වන්නේය..

-----------------------------------------------------
මෙසේ සියළු තේරීම් අවසානයේ යාන්ත්‍රිකයා කල් යල් බලා මිනිස් ලොව පිළිසිඳ ගත්තේය.. එයින් දසමසක් ගතවූ තැන චෑවු ගා මෙලොව උපත ලැබුවේය..

-------------------------------------------------------------------------------------
කෝ දැන් කට්ටියම මට ස්තූති කළානං..
මොකා... ඒ ඇයි කියලා අහන්නේ..? ඇයි මතක නැද්ද මේ ලෝකෙ බේරගත්තෙ මමනේ... ආ.. ඇයි නැද්ද කියන්නේ? මගේ ආයුෂ අවුරුදු හැත්තෑ පහක් නොවුණානං බලන්න තිබුණා කට්ටිය අද ජීවත් වෙන හැටි... මගේ විශේෂ ඉල්ලීම පරිදි ආයුෂ පවත්වාගතයුතු නිසා තමයි ලෝක විනාසෙ කල් දාන්න ලෝක පාලක දෙයියො එකඟ වුණේ.....
හරී.... ඉතිං ඒකෙ ගෞරවේ මංම භාරගන්නංකෝ........8-}

Thursday, December 20, 2012

ක්ලාස් එකක ඉඳගන්න තැන තෝරා ගැනීමේ රහස්



 ක්ලාස් එකකට ගියාට ඉඳගන්න තැන තෝර ගන්න එක ආවට ගියාට කරන්න බෑ.. ඒකට සුදුසු තැන තොරගන්න ඕන.. මේ යාන්ත්‍රිකයගෙ තැන් තෝරගත්ත හැටි..ලියා තියන්නෙ අනාගත පරපුරේ ප්‍රයෝජනය උදෙසා..:)

ක්ලාස් එකක ඉඳ ගැනීමේ යාන්ත්‍රිකයගේ ප්‍රතිපත්ති මාලාව

01).ගණං ක්ලාස් එකට අදාලව:-
 මැත්ස් ක්ලාස් එකේ දළ සැලැස්ම.. 
නිස් පාටින් තියෙන්නෙ යාන්ත්‍රිකයගෙ බංකුව

ඔය නිල් පාටින් පෙනෙන්නේ යාන්ත්‍රිකයා හැමදාම ගණන් ක්ලාස් එකේ ස්ථානගත වෙන පොට් එක.. එතන තෝරගන්න හේතු ගොඩයි..

පළවෙනි එක ඔතන ඉස්සරහින් ඉන්නෙ සුපිරි මීටරයක්.. ඒක මගේ ආරක්ෂායට හොඳයි.. අනික එතෙන්ට සර්ව පෙනුනත් සර්ට මාව පෙනෙන්නෙ නෑ.. සර් කතා කරන දේවල් ඇහෙන බෆල් එක තිබුණේ මට උඩින් බිත්තියේ.. ඒ නිසා සර්ගෙ මිහිරි කටහඬ කණ බිහිරි කරවන සුළු වුණේත් නෑ.. සර් කියන දේවල් හොඳට ඇහෙනවා.. ඔතන බිත්තිය තියෙන නිසා පොඩි ‍හේත්තුවක් දාගන්නත් පුළුවන්...

රතුපාටින් තියෙන්නෙ අවදානම් කළාපය නොහොත් ගෑනු ළමයින් ගෙ පෙදෙස.. ඉතිං ඔය මැද තියෙන ලයින් එකේ ඉඳගත්තනම් සම්මජ්ජාතියට මෙලෝ දෙයක් ඉගෙන ගන්න වෙන්නැ.. ඩබල් ලයින් වලින් තියෙන්නේ සර්ගෙ ගමන් මාර්ගය.. ඒ අහල පහල ඉන්න එකත් තරමක් විතර අවදානම්.. ඉතිං මං හිටපු තැන ආරක්ෂිතයි වගේම ඉගන ගන්නත් ඉතා සුදුසුයි..:)

පිටිපස්සහ සුදුසුයි ෆන් එකේ ඉන්න.. මොකද ඒ හරියෙ ඉන්නෙ රේඩියෝ අහන සෙට් එක..:))

02). ෆිසික්ස් ක්ලාස් එකට අදාලව:-
                                                    ෆිසික්ස් ක්ලා‍ස් එකේ දළ සැලැස්ම

ඔය ෆිසික්ස් ක්ලාස් එක දවල්ට තැම්බෙනව නෙමෙයි ගිනියම් වෙනව.. ඒ නිසා පරසර තත්ව වලට පොදුවේ ඔරොත්තු දෙන තැනක් හොයා ගන්න එක ඉතා වැදගත්.. ඉතින් ඒ ක්ලාස් එකේ මං හිටපු තැන නිතරම සිහිල් සුළං වදින සෞම්‍ය පරසරයක් ඇති ස්ථානයක් කියුවොත් ඉතා නිවැරදියි.. ඒක තෝරා ගැනීමේදීත් රතු පාට කොටස නොහොත් ගැහැනුළමුන්ගෙන් තර්ජන පවතින ස්ථාන මගහරින්න වෙනවා..

ඊළඟට අපි හිටියෙ බැල්කනියක.. ඒ නිසා සර්ව පැහැදිලිව පෙනෙනවා.. මං හිටපු තැනට ආසන්නව බෆල් හයි කරල තියෙන නිසා හඬත් හොඳට ඇහෙනවා.. ඒත් බැල්කනියෙ ඉස්සරහම ඉන්න බෑ එතකොට සර්ට නෝට්.. කෝකටත් සුපිරි මීටර දෙකක් මගෙ ළඟම තියාගත්තා මගේ ආරක්ෂාව තවත් තහවුරු වෙන්න..

03). කෙමිස්ට්‍රි ක්ලාස් එකට අදාලව:-
                                                 කෙමිස්ට්‍රි ක්ලාස් එකේ දළ සැලැස්ම

කළු තීරය සර්ගෙ ඉගැන්වීම් කලාපය.. යාන්ත්‍රිකයට ටිකක් (ඒ කියුවෙ හොඳටම) කෙමිස්ට්‍රි බැරි නිසාත් ක්ලාස් එකේ ළමයි අඩු නිසාත්, සර්ගෙන් ප්‍රශ්න ඇසීමේ අවස්ථාව ඇති නිසාත්, ඒක ලැජ්ජාවට කාරණාවක් නොවන නිසාත් පරිසර තත්ව අමතක කරලා ඔය නිල් පාටින් පෙන්නන තැන තිබිච්ච බංකුවේ යාළුවොත් එක්ක ඉඳගත්ත...
ඉස්සරහම පේළිය දුන්න කොල්ලො දෙන්නෙක්ට.. ඒකට හේතු දෙකයි..
එක,
උන් දෙන්නම මීටර්
දෙක,
ඊට ඉස්සරහ පේළියේ හිටියෙ උන්ගෙ කෙල්ලො දෙන්න..
ඉතිං යාළුවට අවස්ථාව දෙන්න ඕන නිසා අපි දෙවෙනි පේළිය තෝරගත්ත..


දැං පේනවනේ.. ක්ලාස් එකක් තිබුණු පළියට, ඒකට ගිය පළියට ඊට සල්ලි ගෙවපු පළියට ඒකෙ ඉඳගන්න බෑ කියල.. තමන්ට සුදුසුම සහ අවශ්‍යතාවට ගැලපෙන තැන තෝරගන්න ඕන.. අවශ්‍යතාවයට ගැලපෙන තැන් ක්ලාස්වල තියෙනවා..

කාට හරි මේ ගැන උපදෙස් ඒම ඕනනම් නොඅඩුව ලබා දෙන්න යාන්ත්‍රිකයා සූදානම්..

Monday, December 17, 2012

ඒයි.. මට ඇහෙන්න බනිනව නෙමෙයි..



                            ලංකාවේ වැදගත්ම පොට් එක.. පින්තූරය මෙතනින්.


දකින දකින හැම තැනම මොකෙක් හරි මොකකට හරි දේශපාලකයෙක්ට බනින්නේය. පහුගිය දිනෙක එවැනි කතාවක් අසා යාන්ත්‍රිකයාට මේ සිතිවිල්ල පහල විය.

යාන්ත්‍රිකයාට දේශපාලකයින්ට බනින උන් පෙන්නන්නට බැරිය.. ඒ මේ නිසාය.. මේක ලිවීමෙන් පසුව යාන්ත්‍රිකයාට වැටෙන කොමෙන්ටුවත් නොවැටී යාමේ අවදානමක් ද ඇත්තේය.
     
ලංකාවේ හැම එකෙක්ම දේශ පාලකයින්ට බනින්නේ හරියට එතුමන්ලා පාර්ලිමේන්තු ගියේ අහසින් වගේය. ලංකාවේ කවුරුවත්ම ජීවිතේට ඡන්දය නොදාපු අය වගේය. නමුත් පාර්ලිමේන්‍තුවේම දෙසිය විසිපහකි. තවද පළාත් සභා ද 9 කි. ඒවායේ මන්ත්‍රීවරු ගාන නම් යාන්ත්‍රිකයා නොදන්නේය.. නමුත් එකෙක් දෙන්නෙක් නම් නොවන්නේය.. ඒ මදිවට ප්‍රාදේශීය සභා ගානද සැලකිය යුතු ඉලක්කමකි.. මෙසේ ගත් කළ මන්ත්‍රීවරු පඳුරකට එකා ගානේ සිටිති.. නමුත් මේ එකෙක් වත් ලංකාවේ මිනිස්සුන්ගේ ඡන්දයෙන් ගිය අය නොවිය යුතුය.. මොකද ඒ තරමට ලංකාවේ මිනිස්සු දේශ පාලකයොන්ට බනින නිසාවෙන්ය..

Friday, December 14, 2012

මගේ මත හත


01).ලොක විනාසේ:-
මේ පින්තූරය ගත්තෙ මෙතනින්

උණත් නොවුණත් මට කියන්න තියෙන්නෙ මෙච්චරයි.. යාන්ත්‍රිකයගේ ආයුෂ අවුරුදු හැත්තෑ පහක්.. ඉතිං  ලෝකෙ වැනසුනත් නොවුණත් යාන්ත්‍රිකය ජීවත් වෙනව දෙදාස් හැට අටේ අප්‍රේල් දහනමය වෙනකන්.. ඒක නිසා ලෝක විනාසෙ මට ප්‍රශ්ණයක් නෙමෙයි..

02).ළඟක ඉඳන් එන පිටසක්වලයො:-
රෙඩාර් වලට අහුවුණේ නෑ කියල එහෙම ජාතියක් නෑ කියන්න බෑනේ..?? අනික ඒ දැක්ක එළි වලට කියන්නෙ අද්භූත වස්තු කියල.. එහෙවු එකේ රෙඩාර් වලට අහුවුණානං ඒවා අද්භූත වස්තු වෙනවැයි?? මං මේ කියන්නෙ පිටසක්වලයො ඉන්නව කියල නෙමෙයි.. ඉන්නත් ප්ුළුවන් නොඉන්නත් පුළුවන්..  ඉතින් පණ්ඩිතකම් පැත්තක තියල කෝකටත් හොයල බලන එක කාටකාටත් හොඳයි.. එහෙම කියන්නෙ මේ විද්‍යාඥයෝ ජීවයක් තියෙවද බලන්න අඟහරුගෙ වතුර හොයන්න ඩොලර් බිලියන කෝටි ගානක් වියදම් කරපු ජාතියක් නිසා..

Monday, December 10, 2012

එච්.අයි.වී වලට විසඳුමක් සමඟින් අළුත් සමාජ රෝගකාරක වෛරසයක් සොයාගැනේ...!!!



                              මේක මෙ‍තනට ආසාදනය වුණේ මෙතනින්


නිවේදක යාන්ත්‍රිකයා:-
ආයුබෝවන්..!!!
මම YNN NEWS වෙනුවෙන් යාන්ත්‍රිකයා.. මම දැන් රැඳී සිටින්නේ ලන්ඩන් කේම්බ්‍රිජ් විශ්වවිද්‍යාලයේ ජීව විද්‍යාව පිළිබඳ මහාචාර්ය J.V. යාන්ත්‍රිකයා මහතාත් සමගයි. පසුගියදා භෞතික විද්‍යාව වෙනුවෙන් විශාල මෙහෙයක් කළ නොබෙල් සම්මාන ලාභී මහාචාර්ය යාන්ත්‍රිකයා මහතා අද ජීව විද්‍යා ලෝකය කණපිට පෙරළන්නයි සූදානම.

Monday, December 3, 2012

යාන්ත්‍රිකයා භෞතික විද්‍යාව කණපිට පෙරළයි...!! ෆිසික්ස් ලොව මවිත කළ විසි එක් වෙනි සියවසේ මහා සොයා ගැනීම ලංකාවෙන්..!!



පහුගිය දා යාන්ත්‍රිකයා ඉතා වෙහෙස වී විශාල කැපවීමකින් හා සැලකිය යුතු කාලයක්ද කැප කරමින් වත්ත සුද්ධ කරමින් සිටි මොහොතේ භෞතික විද්‍යාව කණපිට පෙරළිය හැකි මට්ටමේ මූලධර්මයක් සොයාගන්නා ලදි......

            භෞතික විද්‍යා ලෝලීන්ගේ දැනගැනීම සඳහා යාන්ත්‍රිකයා එය මෙසේ සිය බ්ලොග් අඩවියේ  සඳහන්කරනු ලැබේ. ඔහු විසින් එය යාන්ත්‍රිකයාගේ සංවෘත විවෘතතාව පිළිබඳ සර්වත්‍ර නියමය වශයෙන්ද නම් කොට ඇත.
                  මේ වගේ වැදගත් තැනකට මෙයා රිංගුවේ කොහෙන්ද?? බැලුවම මෙතනින්        
                

Saturday, December 1, 2012

පසුම්බි චෝරක කතා වස්තුව

     අවුරුද්දකින් විතර යට ගිය දවස මේ ලංකාද්වීපයේ මිහිඳු නම් රජ කෙනෙකුන් රාජ්‍ය කරන කල්හී.. මහානුවර එක්තරා ග්‍රාමයක කෙළෙඹි පුත්‍රයින් දෙදෙනෙක් ඉතා සමගිව වාසය කරන්නෝය.. මෙසේ වාසය කරන කල්හී පළමු කෙළඹියාගේ කිසියම් වූ උවමනාවක් සඳහා කොළොම් පුරේට යාමට උවමනා වීය..

     හෙතෙම සිය මිතුරා අමතන්නේ..
             "එම්බල යහළුව.. මාගේ ඉතා වැදගත් වූ කටයුත්තකට කොළොම් තොට බලා යාමට සිදු වී.. නුඹත් මා සමඟ එන්නේ දැ" යි විමසී..

Wednesday, November 28, 2012

මටත් ඕනෙ කැබ් එකක්.........


      පහුගිය දවසක අපි අනුරාධපුරේ ගියා නොවැ ත්‍රීවීල් එකක... චූට්ටං ෆැමිලි ටුවර් එකක්.. ඒක වෙනමම කියන්න ඕන කතාවක්... එක පස්සෙ බලමුකෝ..
                                    
     අනුරාධපුරේ ගියේ ඇස්ටෝං ගෙදරක.. ත්‍රීවීල් එකේ පහක් තහනං උණත් අපි ගියා.. කොහොම හරි ගෙහුං හෙම ‍උත්සවේට කරල දෙන්ට ඕන යුතුකං ටික එහෙම ඉස්ට සිද්ධ කරල නිදා ගන්නකොට රෑ දොළහට එකට විතර ඇති..(එහෙට යනකොටත් රෑ අටට විතර)

    පහු වෙනිදා නුවර අපිට අළුත් අමුතු සිරිත් එක්ක උත්සවේ තිබුණ.. තේ බොන වෙලාවට ඒ කියුවෙ උදේ දහයට විතර... කොහොමෙං කොහොම හරි ඔය අනුරාධපුරෙ ගමන නං සම්මජ්ජාතියට අමතක වෙන්නෑ.. ඔය බ්ලොග් වල නිතරම දකින්න ලැබෙන "ඈ" (උදා:- ගිහිං එන්නං ..) ඉස්සරෝම අහන්න හම්බවුණෙත් අනුරාධ පුරේදී.. කළුතරිං සෙට් එකක් ඇවිත් හිටිය.. ඕනම වාක්‍යක කෙළවරට "න" දාල කතා කරන විධියත් අපිට නිකං මැජික් වගේ.. නුවර අපි ඉතිං ඔය ටී.වී. එකේ විදියටනෙ කතා ‍කරන්නෙ.. ‍එකම වෙනස කෙළවරට "න" වෙනුවට "ට" , "ඩ" වැටෙන එක තමා.. ඒ කියන්නෙ "යන්න" කියන වචනෙ නුවරදි "යන්ඩ" හරි "යන්ට" හරි වෙනව.. ඒක අනුරාධ පුරේදී "යන්ඩ ඈ.." 

Monday, November 26, 2012

ඩෙංගු මර බිය දුරු කළ අපේ දොස්තර නෝනා‍

         ඔය සුද්දා ලංකාව අතෑරල යනකොට නිකංම ගියේ නෑනේ. ඌ ගියේ කළු සුද්දො පැටවු ටිකකුත් හදල නෙව. අපේ තිබිච්චි හැම දේම උදුරගෙන උංගෙ ලට්ට ලොට්ට ටික දාලනේ ගියේ..
     
        අපේ මිනිස්සුත් රට බඩුනං ඕන දෙයක් කියල බාර ගන්න ජාතියක් නිසා උන් දුන්නු ඕන කුණු ගොඩක් බාර ගත්තෙ ඉහ මුදුනිං.... කිසිම අතුරු ආපදාවක් තැති කසාය කෝප්පෙ වත්තට විසි කොරල පැනඩෝල් පෙත්ත ඕන ලෙඩකට කටේ ඔබාගන්නේ එහෙමනේ... කාටද සහතික වෙන්ට පුළුහං ඕවා සීයට සීයක් කිසි අවුලක් නැති බෙහෙත් කියල.. කවදාවත් අහල තියෙනවද කසාය කෝප්පයක් බීල ආසාත්මිකතාවක් ඇතිවුණ කෙනෙක් ගැන???.. මාත්‍රාවට වැඩියෙං බීල පරලෝකප්‍රාප්ත උණ කෙනෙක් ගැන????... ඔය ඔක්කොම ලෙඩ සුද්දගෙ පෙති වල විතරයි..

Friday, November 23, 2012

සංවේගයෙන් ලියනු ලැබේ.............


මේක ලියන්න හේතු වුණේ අද දවල් රේඩියෝවෙ ප්‍රවෘත්ති වලට අහපු කතාවක් නිසා.. ඒ ලෙවල් කොල්ලෙකුයි කෙල්ලෙකුයි කොච්චියට පැනල සියදිවි නහගෙන..ආරංචි හැටියට ලව් හුටපටයක් ලු. මම ගම රට ලියන්නෙ නෑ. ඒකට හේතුව පස්සෙ ඔයාලට තේරෙයි.

මුලින්ම කියන්න ඕන මම මේක ලියන්නෙ හරිම සංවේගයකින්.(මැරුණු දෙන්න ගැන නම් නවේ. )

මැරුණ අයට මේව කියල වැඩක් නෑනේ.. මේ කියන්නෙ මැරෙන්න හිතාගෙන ඉන්න අයට.

Monday, November 19, 2012

රිලව් ඇවිල්ලෝ...



අද කියන්න යන්නෙ අපේ පැත්තේ ප්‍රාදේශීය අර්බූධයක් ගැන.. රිලව්.. මුලු ගමම ආක්‍රමණය කරල..  සමහර ඉඩම් වල උන් අධිගෘහිත වෙලා.. රතිඤ්ඤ නෙවෙයි බෝම්බ දැම්මත් යන්නෙ නැති ගානට උන් බය නැතිවෙලා.. කිසිම අවුලක් නැතිව ඇරල තියෙන ගෙවල් වලට පැනල තියෙන කෑම අරගෙන යනව.. ගෑනු අයගෙ ළමයින්ගෙ ඇඟට පනිනව..
අර ඩී.ඩී.ටී. වලට  මැලේරියා මදුරුවෝ පුරුදු වුණා වගේ රිලව් රතිඤ්ඤා වලට අනුවර්තනේ වෙලා...

දිවිය නගන්න ඇට බීජ පැකැට් බෙදල දුන්නට කොහේ වවන්ටද? වැඩිහරියක් ගෙවල් වල වැඩේ අතෑරල දැම්මෙ මේ රිලව් නිසා. අපි වවනව.. උන් කනව..

මේ ප්‍රශනෙ අපේ ගමට විතරක් නෙවේ මයෙ හිතේ.. රන්දෙණිගල වගේ ගම් වලටත්, නුවර ටවුමේ පවා ලක්ෂ ගාණක් රිලව්... ඔය පේපර් මාකිං යන ටීචර්ලගෙ කෑම පැකට් හෙමත් මුන් උදුරගෙන යනවලු..
මෙතන තියෙන අවුල තමයි රිලව් මීට අවුරුදු හතර පහකට කළින් මෙහෙම හිටියෙ නැති එකයි.. එහෙනං කොහෙන්ද මෙච්චර රිලව් තොගයක්? මොකෝ මේ අවුරුදු හතර පහේ දී එක වතාවකට රිලවියක් පැටව් විසිපහ තිහ වදන්ටැයි?.. 

Thursday, November 15, 2012

බිල්ලගෙ පරමාදර්සේ


            බ්ග් එහෙකුත් පටංගත්ත එකේ වැදගත් මොන මොනවහරි කොටන්නං කියල තමයි ඉඳගත්තෙ. මොනා කොරන්ටද...... කම්මැලිකම ඔළුවට ගහල නොවැ. උදේ ඉඳං චොර චොරේ..  වැස්ස නවතින පාටකුත් නෑ... මං අහගෙන අනිත් පැති වලට හෝදගෙන යන්ට වහිනවලු. කොළබිස්සට නං තාම වැස්ස මදි වගේ. තාමත් වික්ටෝරියාවවත් සම්පූර්ණයෙංම පිරිල නෑ මයෙ හිතේ.
             ඇයි අප්පේ අවුරුද්දකට කිට්ටු කාලයක් වේලෙන්ටම පෑව්වා නොවෑ..... අ‍නික්වා තියා කොස් ගස් පොල් ගස් පවා මැරුණා..සමහර  ඉඩම් වල පොල් ගස් විස්ස තිහි.... අපේ ඉඩමේ විතරයි එක ගහක්වත් මැරුණේ නැත්තේ...

Wednesday, November 14, 2012

ආයිබෝවේවා......... කියවන හැමෝටම...!!! ඔන්න අපිත් බ්ලොග් ලෝකෙට පිවිසියා..

     
 ඔන්න අපිත් සයිබරේට ආගමනය උණා හරිය. එහෙම කියුවට ඉතිං නෙට් එකට ආවෙ නං අද ඊයෙ නෙවෙයි.
     අවුරුදු දෙහෙකට විතර කළිං තමයි ඩොංගල් එක ගත්තෙ. ඒ දවස් වල බ්ලොග් කියෙව්ව මිසක් ලියන්න හිතුවෙ නෑ. ඔන්න ෆන් එහෙකටත් එක්ක ලියන්න හිතුව. මේක දිගටම ලියන්න හිතාගෙන තමයි පටංගත්තෙ.
      මං ලියන්න හිතාගෙන ඉන්නෙ ඔය එදාට එදාට  මට අහන්න දකින්න ලැබෙන දේවල් ලියන්න තමයි. ඒව අනිත් අයට වැදගත් නොවෙන්නත් පුළුවන්. ඒත් ඩයරියක් වත් නොලියන මට මේ බ්ලොග් එක නම් වැදගත් වෙයි.
      ආරාධනා කරනවා හැම දෙනාටම කියවල බලන්න. ඊට පස්සෙ යටින් හිතෙන දෙයක් කමෙන්ට් කරල යන්න.